Azərbaycan Turizm Bürosunun Türkiyənin aparıcı turizm şirkətlərinin nümayəndələri üçün Azərbaycana təşkil etdiyi tanışlıq səfəri çərçivəsində (FAM Trip) Azərbaycan Turizm Agentlikləri Assosiasiyasının nümayəndələri ilə B2B görüş təşkil edilib.

Görüşdə Türkiyə bazarı üzrə fəaliyyət göstərən ATAA üzvləri ilə Türkiyənin turizm sənayesi nümayəndələri arasında əməkdaşlıq əlaqələrinin genişləndirilməsi, mövcud və potensialı böyük olan turizm marşrutları üzrə qarşılıqlı maraq doğuran turpaketlərin hazırlanması, iş birliyinin artırılması, turizm məhsullarının və istiqamətlərinin birgə təşviqi müzakirə olunub.

Bununla yanaşı iki ölkənin turizm şirkətləri arasında birbaşa əlaqələrin qurulması və ölkələr arasında turist mübadiləsinin artırılması, birgə təbliğat kampaniyalarının keçirilməsi və infoturların təşkili nəzərdən keçirilib, müxtəlif təkliflər üzərində fikir mübadiləsi aparılıb.

Qeyd edək ki, iki ölkənin turizm nümayəndələri arasında qurulan bu formatlı birbaşa işgüzar əlaqələr uzunmüddətli tərəfdaşlıqların formalaşmasına və dərinləşdirilməsinə, o cümlədən turizm potensialının qarşılıqlı və səmərəli inkişafına töhfə vermək məqsədini daşıyır.