Azərbaycan Turizm Agentlikləri Assosiasiyasının (ATAA) İdarə Heyətinin sədri Göydəniz Qəhrəmanov Peşəkar Turizmçilər Komitəsinin nümayəndələri ilə ölkə turizminin inkişaf perspektivlərini, o cümlədən Assosiasiyanın və üzv şirkətlərin fəaliyyətinə dəstək olan təşəbbüsləri müzakirə ediblər.

Görüş zamanı ATAA üzvüləri üçün daxili turizmin təşviqi, regionların turizm potensialının daha səmərəli şəkildə tanıdılması və yerli turizm məhsullarının rəqabət qabiliyyətinin artırılması, həmçinin ATAA üzvləri tərəfindən göstərilən xidmətlərin keyfiyyət göstəricilərinin yüksəldilməsi və müştəri məmnuniyyətinin təmin olunması ətrafında fikir mübadiləsi aparılıb.

Bununla yanaşı regionlara təşkil olunan infoturların sayının artırılması və yeni turizm marşrutlarının hazırlanması ilə bağlı təkliflər səsləndirilib.

Görüşdə həmçinin ATAA üzvləri tərəfindən turizm bazarında sağlam rəqabət mühitinin qorunub saxlanılmasının vacibliyi bildirilib və etik iş prinsiplərinə riayət edilməsinin sektorun davamlı inkişafına töhfə verəcəyi qeyd olunub. Bununla bağlı Assosiasiyada daxili istifadə üçün etik kodeksin hazırlanması təklif edilib.

Bundan başqa peşəkar kadr potensialının gücləndirilməsi məqsədilə turizm sahəsində təlim-tədris layihələrinin həyata keçirilməsi, ixtisasartırma proqramlarının təşkili və bu sahə üzrə çalışan mütəxəssislərin bilik və bacarıqlarının artırılması məsələləri diqqət mərkəzində olub.

Görüşdə İdarə Heyəti sədri tərəfindən komitə üzvlərinə müzakirələrdə qaldırılan məsələlərə dair təkliflərin hazırlanaraq təqdim olunması tapşırılıb.