Azərbaycan Turizm Agentlikləri Assosiasiyasının (ATAA) Getmə Turizm Komitəsinin və Beynəlxalq Əlaqələr Şöbəsinin, eləcə də Azərbaycan Turizm Bürosunun nümayəndələrinin iştirakı ilə Braziliyanın Turizm Agentlikləri Assosiasiyasının (ABAV) təmsilçiləri və aparıcı turizm şirkətlərinin rəhbərləri ilə onlayn görüş keçirilib.
Görüş zamanı Assosiasiyalar arasında birbaşa əməkdaşlıq əlaqələrinin qurulması, hər iki ölkənin turizm potensialının, məhsullarının və marşrutlarının qarşılıqlı şəkildə təşviqi, həmçinin turizm sənayesi nümayəndələri arasında işgüzar əlaqələrin gücləndirilməsi məsələləri müzakirə olunub.
Həmçinin ilkin mərhələdə Azərbaycan və Braziliyanın turizm şirkətlərinin iştirakı ilə vebinarların və onlayn B2B görüşlərin təşkil olunması, gələcəkdə isə qarşılıqlı tanışlıq səfərlərinin həyata keçirilməsi və yeni turpaketlərin hazırlanması istiqamətində əməkdaşlığın qurulması barədə fikir mübadiləsi aparılıb.
Görüş çərçivəsində Braziliyanın Turizm Agentlikləri Assosiasiyasının nümayəndələri Azərbaycan Turizm Agentlikləri Assosiasiyasının üzvlərini 2026-cı ildə Braziliyada keçiriləcək “ABAV Expo 2026” beynəlxalq turizm sərgisində iştirak etməyə dəvət ediblər.
ATAA