Yunanıstanın turizm sənayesi ilə qarşılıqlı əməkdaşlığın genişləndirilməsi və inkişafı etdirilməsi imkanları Azərbaycan Turizm Agentlikləri Assosiasioyasının İdarə Heyətinin sədri Göydəniz Qəhrəmanovla Yunanıstan Respublikasının ölkəmizdəki fövqəladə və səlahiyyətli səfiri Maria Papakonstantinu və səfirin müavini İoannis Mavridis arasında keçirilən görüşdə müzakirə edilib.

Görüşdə səfir Maria Papakonstantinu ATAA-nın fəaliyyəti, ölkə turizminin inkişafındakı rolu, Assosiasiya nəzdində fəaliyyət göstərən komitə və komissiyalar, o cümlədən üzvləri haqqında ətraflı məlumatlandırılıb.

Müzakirələr zamanı Azərbaycan və Yunanıstanın zəngin mədəni irsə, unikal təbiətə və fərqli turizm məhsullarına malik olduğunu qeyd edən Göydəniz Qəhrmanov bu cür önəmli amillərin qarşılıqlı turist axınının artırılması üçün əlverişli şərait yaratdığını bildirib. ATAA sədri iki ölkə arasında turizm əlaqələrinin mövcud vəziyyətini müsbət qiymətləndirərək bu istiqamətdə böyük inkişaf potensialının olduğunu, turizm sahəsində əlaqələrin daha da möhkəmləndirilməsinin vacibliyini diqqətə çatdırıb.

Azərbaycanın turizm baxımından Yunanıstan üçün perspektivli istiqamətlərdən biri olduğunu vurğulayan Maria Papakonstantinu iki ölkənin turizm sektorları arasında qarşılıqlı maraq doğuran əməkdaşlığın genişləndirilməsinə, birbaşa aviareyslərin təşviqinə və turizm şirkətləri ilə əlaqələrin gücləndirilməsinə böyük önəm verdiyini deyib. Diplomat Yunanıstana səfər üçün vizaların verilməsi prosedurlarının asanlaşdırılması üçün səfirlik tərəfindən ATAA üzvlərinə lazımi dəstəyin göstərilməsinə hazır olduqlarını bildirib.

Görüş çərçivəsində tərəflər turist cəlbediciliyinin artırılması üçün birbaşa uçuşların sayının çoxaldılması, yeni marşrutların açılması, birgə tanıtım kampaniyalarının və infoturların təşkili, onlayn və B2B görüşlərin keçirilməsi, həmçinin iki ölkənin assosiasiyaları arasında əməkdalıq əlaqələrin inkişaf etdirilməsi məsələləri ətrafında fikir mübadiləsi aparıblar.