“Absheron Hotel Group”un təşəbbüsü ilə “Boutique 19” hotelində Azərbaycan Turizm Agentlikləri Assosiasiyasının (ATAA) İdarə Heyətinin üzvləri, “İçərişəhər” Dövlət Tarix-Memarlıq Qoruğu İdarəsinin rəhbər şəxsləri, eləcə də “Absheron Hotel Grop”un nümayəndələri üçün işgüzar səhər yeməyi təşkil edilib.

Görüşdə ATAA, “Absheron Hotel Grop” və “İçərişəhər” Dövlət Tarix-Memarlıq Qoruğu İdarəsi tərəfindən görülən işlər, həyata keçirilən yeniliklər və tədbirlərlə bağlı geniş məlumatlar təqdim olunub.

Görüşdə çıxış edən “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud İçərişəhərdə xidmətlərin, məhsulların və ümumilikdə şəhərin çoxdilli əsasda rəqəmsallaşdırılması istiqamətində görülən işlər, gələn il istifadəyə verilməsi planlaşdırılan və İçərişəhər turizminə həsr olunacaq veb-sayt və mobil tətbiqlə, o cümlədən “Smart Reserve” konsepsiyası haqda və digər həyata keçirilən yeniliklərlə bağlı məlumat verib.

Rüfət Mahmud Qoruğun turizm sahəsində yeni əməkdaşlıq formatlarına açıq olduğunu və ölkə turizminin inkişafı məqsədilə tərəfdaşlarla birgə layihələr həyata keçirməyə, İçərişəhər və turizm tərəfdaşları arasında əməkdaşlıq prosesinin sadələşdirilməsi istiqamətində mümkün mexanizmləri müzakirə etməyə hazır olduğunu bildirib.

Bakıya səfər edən əcnəbi turistlərin böyük əksəriyyətinin görməli yerlər sırasında İçəri Şəhərə xüsusi üstünlük verdiklərini qeyd edən Azərbaycan Turizm Agentlikləri Assosiasiyasının (ATAA) İdarə Heyətinin sədri Göydəniz Qəhrəmanov ATAA üzvləri tərəfindən qoruğa turistlərin ziyarətinin təşkil edildiyini bildirib.

Görüş zamanı ATAA üzvlərinin “İçərişəhər” Dövlət Tarix-Memarlıq Qoruğu ilə əməkdaşlıq əlaqələrinin genişləndirilməsində maraqlı olduqlarını bildirən Göydəniz Qəhrəmanov qoruq tərəfindən muzeylərə giriş üçün sənədləşmə prosedurları ilə bağlı tədbiq olunan yeni qaydalara da toxunaraq üzvlərin xahiş və istəklərini diqqətə çatdırıb.

Rüfət Mahmud öz növbəsində ATAA üzvlərinə prosedurların sadələşdirilməsi üçün Qoruq tərəfindən dəstək göstəriləcəyini vurğulayıb.

İşgüzar səhər yeməyi çərçivəsində ATAA nümayəndələri həmçinin “Boutique 19” hoteli ilə yaxından tanış olub, onlara“Absheron Hotel Group” tərəfindən həyata keçirilən yeniliklər haqda məlumat verilib, əməkdaşlıq əlaqələrinin inkişaf perspektivləri müzakirə olunub.